19 тамызда Л. Н. Толстой атындағы Қостанай облыстық әмбебап ғылыми кітапханасының кітапханаларды дамыту бөлімі «Kostanay Book Fair» кітап көрме-жәрмеңкесінің қатысушысы, алаштанушы ғалым, «Ә. Бөкейхан Алаш» ғылыми-зерттеу институтының аға ғылыми қызметкері, «Qyr Balasy» ҚҚ Семей филиалының директоры Ақжол Қадылбекұлымен кездесу өткізді.

Ақжол Қадылбекұлы кездесуге қатысушыларға маңызды экспедицияларға – «Ахмет Байтұрсынұлы: Төте жазу графикасы», «Алаш жолы» халықаралық экспедициясы Ресей бағытына» қатысқаны туралы айтып берді. Экспедицияның басты мақсаты қазақ ағартушысының өміріне қатысты олқылықтардың орнын толтыру және жаңа деректерді іздестіру болды.

Халықаралық тарихи-ағарту экспедициясы барысында Мәскеудің ірі кітапханалары мен мұражайларының қорларынан Ахмет Байтұрсынұлының өмірі мен шығармашылығы туралы бірегей мұрағаттық материал алынды.

Сондай-ақ кездесуге келген қонақтарды Ахмет Байтұрсынұлының классикалық араб жазуына негізделген әліпбиімен таныстырып, ол бойынша шеберлік сыныбын өткізді.