28 ақпанда Абай атындағы Шығыс Қазақстан облыстық әмбебап кітапханасы Л. Н. Толстой атындағы ҚОӘҒК-ның оқырманы, талантты жас жазушы және журналист, облыстық «Қостанай таңы» газетінің тілшісі, «Ақ қауырсын» әдеби клубының мүшесі Нұрмұханов Бейбіт Мейрамұлымен «Қасиет бар қаламда мен білмеген» атты онлайн кездесу өткізді. Онлайн кездесуге Шығыс Қазақстан облысының барлық аудандық кітапханаларынан 41 қатысушы қатысты. Жас жазушы кездесуге қатысушыларды өзі туралы және өз шығармалары туралы, әдебиет туралы, Қазақстандағы жазушылық кәсіптің болашағы туралы мазмұнды әрі қызықты әңгімесімен баурап алды. Кездесу соңында әдемі әңгіме мен сырлы сұхбатқа куә болған шараға қатысушылар жас жазушыға қаламының мұқалмауын, шабытының сарқылмауын және оқырмандарының көп болуын тілесті.